80 urtez isilpean mantendu den istorio bat azalarazi nahi du "Ama, nora goaz?" dokumentalak. Emakume anonimoak ditu protagonista, eta agian horixe da isiltasun horren arrazoia.Izan ere, Gerra Zibileko istorioak behin eta berriro entzun ditugun arren, nork ezagutzen du Gerra Zibilean Gipuzkoatik kanporatu zituzten emakumeen eta haurren istorioa?

1936ko udazkenean hasi zen guztia, Frankistek Gipuzkoa bereganatu eta berehala. Gipuzkoako herrietan bando errepublikarreko herritarren kontrako neurriak hartu zituzten, eta Errepublikaren alde frentean borrokan ari ziren gizonen emazteak biktima zuzenak izan ziren.Senarrak frentetik itzultzen ez baziren Gipuzkoatik kanporatuak izango ziren.